జీఎస్టీ అంటే అదేదో బ్రహ్మాండం కాదు

2

జీఎస్టీ – ఇప్పుడు దేశవ్యాప్తంగా జరుగుతున్న చర్చ. నిన్నటి దాకా ఉన్న అన్ని రకాల పన్నులను రద్దు చేస్తూ పన్ను విధానంలో మోదీ సర్కార్ తీసుకు వస్తున్న అతి పెద్ద పన్ను సంస్కరణ. అయితే మోదీ ఇష్టారాజ్యంగా చేసుకుంటూపోతున్నారని కొంత మంది, లేదు లేదు ఆయన ఏం చేసినా దేశ హితం కోసం అంటూ మరికొందరు వాదులాడుతున్నారు. ఎవరి వాదనలు ఎలా ఉన్నా సామాన్య జనాలు మాత్రం తీవ్ర ఇబ్బందులు పడుతున్నారు. అసలు జీఎస్టీ అంటే ఏమిటో చాలా మందికి తెలియదు.. చదువుకున్న వారికి కూడా దానిపై అవగాహన లేదు. జులై 1 నుండి జీఎస్టీ అమలవుతోందని.. ఖచ్చితంగా జీఎస్టీ కింద నమోదు చేసుకోవాలని మీడియా తెగ భయపెడుతోంది. అయితే మోదీ సర్కార్ జీఎస్టీ అంటే ఏమిటో వివరించడం.. దాన్ని ఎలా కట్టాలి.. ఎవరు కట్టాలి? అనే అతి సాధరణ ప్రశ్నలను కూడా ప్రభుత్వం ప్రజలకు అవగాహన కల్పించలేకపోతోంది.

ఓ మిత్రుడికి చిన్నపాటి వ్యాపారం ఉంది. అయితే ఏడాదికి 20లక్షలు మించిన వ్యాపారం చేస్తే జీఎస్టీ కింద పన్ను కట్టాలి. కానీ దాని గురించి సరైన అవగాహన లేకపోవడంతో చాలా మంది మార్కెట్ లో బ్రోకర్లను పట్టుకుంటున్నారు. అలాగే ఆ మిత్రుడు కూడా మార్కెట్లో జీఎస్టీ రిజిస్ట్రేషన్ కు ఎంత అవుతుంది అని కనుక్కుంటే.. ఏకంగా 3వేల రూపాయలు డిమాండ్ చేశారట. ఇది నిజంగా సిగ్గు చేటు. ప్రభుత్వం చేయాల్సిన పని సరిగ్గా చేయకపోవడంతో ఇలాంటి వాటికి అవకాశం కలుగుతోంది. అయితే ఆన్ లైన్ లో మాత్రం దీనికి ఎలాంటి డబ్బులు అవసరం లేదు.. కేవలం అవగాహన ఉంటే చాలు. కొంత మంది మాత్రం ఆన్ లైన్ లో దీని గురించి మొత్తం తెలుసుకొని ఆ తర్వాత కడుతున్నారు.

ఇక జీఎస్టీ అంటే ఏమిటో ఒక్క లైన్ లో చెప్పాలి దేశం మొత్తం ఒకే పన్ను. ఉదాహరణకు గుజరాత్ లో ఓ కుర్చీ ధర 1000 రూపాయలు అయితే దానిపై ఆ రాష్ట్రంలో ఎంత పన్ను వేస్తారో తమిళనాడులో కూడా అంతే పన్ను వేస్తారు. కానీ గతంలో అలా కాకుండా ఒక్కో రాష్ట్ర ప్రభుత్వం నిర్ణయించిన పన్ను ఉండేది. దీని వల్ల దేశంలో అమలవుతున్న అన్ని పన్నులు రద్దవుతాయి. చివరకు ఒకే పన్ను అమలులోకి వస్తుంది అదే జీఎస్టీ.

ఇక జీఎస్టీ కింద వ్యక్తులు లేదా కంపెనీలు ఎలా రిజిస్ట్రేషన్ చేసుకోవచ్చు.
https://www.gst.gov.in/ కు వెళ్లండి. అక్కడ ట్యాక్స్ పేయర్స్ (Tax Payers)అనే ఆప్షన్ కనబడుతుంది. అక్కడ క్లిక్ చేస్తే మీ వివరాలు అడుగుతుంది. తర్వాత మీకు ఓటీపీ వస్తుంది. ఆ తర్వాత మీ అప్లికేషన్ పరిశీలనకు వెళుతుంది. అంతా ఓకే అనుకుంటే అప్పుడు మీకు ఓ కోడ్ ఇవ్వడం జరుగుతుంది. గతంలో ఎలాగైతే TIN ఉండేదో బహుశా అలాంటిదే.

సాధారణ వ్యక్తుల దగ్గర నుండి పెద్ద పెద్ద కంపెనీల ఓనర్ల వరకు జీఎస్టీ ఏంటో.? దాని తీరు తెన్నులు ఏంటో అర్థం చేసుకోలేకపోతున్నారు. అయితే మొత్తం జీఎస్టీ అంటే ఏమిటో చెప్పకున్నా.. జీఎస్టీ వల్ల ఏం తగ్గుతాయో? ఏం పెరుగుతాయో ? మాత్రం చిన్నగా వివరించే ప్రయత్నం చేస్తున్నాను.

తగ్గేవి- టీ పౌడర్, కాఫీ పౌడర్, చక్కెర, నెయ్యి, వెన్న, హెయిర్ ఆయిల్, టూత్ పేస్ట్ , సబ్బులు, చాక్లెట్లు, బిస్కెట్లు, కేకులు, ఐస్ క్రీమ్స్, ఫర్నీచర్, పిజ్జా, బర్గర్స్, చెప్పులు, బూట్లు, రెడీమేడ్ దుస్తులు, మామూలు దుస్తులు, బైక్స్, కార్లు, వైద్య పరికరాలు, సిమెంట్

పెరిగేవి – బ్రాండెడ్ రైస్, మొబైల్స్, కంప్యూటర్లు, ల్యాప్ ట్యాప్ లు, ఆయుర్దేద మందులు, బ్రాండెడ్ నూడుల్స్, కూల్ డ్రింక్స్, టీవీలు, వాషింగ్ మెషీన్లు, మైక్రో ఓవెన్లు, జువెలరీ, సిగరెట్లు, పాన్ మసాలా

నాడు కలాం వెనక రాజకీయం.. నేడు కోవింద్ ముందు రాజకీయం

narendra-modi-abdul-kalam

పురుషులందు పుణ్యపురుషులు వేరయా అన్నట్లు పాలిటిక్స్ నందు ఎలక్షన్ పాలిటిక్స్ వేరయా అని కూడా అనొచ్చు. ఎందుకంటే నాడు ఎన్టీయే అభ్యర్థి విషయంలో నాటి ప్రధాని అటల్ బిహారీ వాజ్ పేయ్ చూపిన రాజకీయ నీతి ముందు అందరూ బలాదూర్ అయ్యారు. నాడు జరిగిన కొన్ని ఘటనల వల్ల వాజ్ పేయి ప్రభుత్వానికి మైనార్టీలు దూరమవుతున్నారు అనే భావన కలిగింది. అలాంటి సమయంలో అబ్దుల్ కలాంలాంటి వ్యక్తిని రాష్ట్రపతి అభ్యర్థిగా ప్రకటించి అందరి దృష్టిని మరల్చారు. అందరూ అబ్దుల్ కలాం అయితే బెస్ట్ అని అనేలా చేశారు. అయితే నాడు వాజ్ పేయి చూపిన నీతినే దళిత కార్డుతో మోదీ కూడా చేస్తున్నారు. కాకపోతే వాజ్ పేయికి రాజకీయ ప్రయోజనాల కన్నా దేశ ప్రయోజనాలే ముఖ్యం. మోదీకి మాత్రం తన పరపతి ముందు ఏదీ ముఖ్యం కాదు.

దళిత వ్యక్తిని రాష్ట్రపతి అభ్యర్థిగా ప్రకటించడం ద్వారా దేశంలో చాలా చోట్ల ఉన్న దళిత వ్యతిరేకాగ్నిని చల్లార్చేందుకు మోదీ చేస్తున్న ప్రయత్నంలో అందరూ మునిగిపోయారు. కాంగ్రెస్ పార్టీ ఎంతసేపు ఆర్ఎస్ఎస్ మూలలున్నాయా? అని వెతుకుతోంది కానీ మోదీ ప్లాన్ ఏంటో కనిపెట్టలేకపోతోంది. ఉత్తర్ ప్రదేశ్ సహా చాలా చోట్ల దళిత వ్యతిరేకత పెరుగుతున్న తరుణంలో మోదీ అండ్ కో వేసిన అద్భుతమైన ప్లాన్ రాష్ట్రపతి అభ్యర్థి ఎంపిక.

నాడు అబ్దుల్ కలాం పేరును ప్రకటించడానికి ముందు వాజ్ పేయి ప్రధానిగా ఉన్న కాలంలో జరిగిన గోద్రా అల్లర్లు, పశ్చిమ బెంగాల్ ఘటనల కారణంగా మైనార్టీలకు ప్రభుత్వం మీద నమ్మకం సన్నగిల్లింది అయితే అదే సమయంలో రాష్ట్రపతిగా అబ్దుల్ కలాం ను ఎంపిక చేయడం ద్వారా దాన్ని తగ్గించుకోగలిగారు. అయితే ఇదంతా కలాం వెనక జరిగిన వ్యవహారం. కానీ నేడు మోదీ మాత్రం కోవింద్ ముందు రాజకీయం చేస్తున్నారు. ఆర్ఎస్ఎస్ మూలాలు, బి.జె.పి అనుకూల వ్యక్తిని తెర మీదకు తీసుకురాగలిగారు. అయితే రాజకీయ చదరంగంలో ఎన్ని ఆయుధాయులు వీలైతే అన్నింటిని వాడే మోదీ ఈసారి కూడా అలాంటి బలమైన ‘దళిత’ కార్డునే వాడుకున్నారు. పాపం లోగుట్టు ఎరుగని కాంగ్రెస్, యుపిఎ మిత్రపక్షాలు ఎంతసేపూ ఆ కోవింద్ కు వ్యతిరేకంగా అభ్యర్థిని బలపరుస్తున్నారే కానీ దళిత కార్డు ఎందుకు వాడారు.? దాన్ని ఎలా ఎదుర్కోవాలి అనే దానిపై దృష్టిపెట్టలేకపోతున్నారు. కులం కులం కాకుంలం కావాలి అందరికీ ఓ కులం.. అన్నట్లు చివరకు మన కుల పిచ్చి అధ్యక్ష ఎన్నికల వరకు పాకడం ప్రజాస్వామ్యానికి ఉన్న అసలు అదృష్టం, అదే సమయంలో దురదృష్టం